p47

170. Sinabi ni Imam Malik bin Anas رحمه الله :

"Sinuman na kanyang pinanghawakan ang pamamaraan ng Ahlus Sunnah wal Jama'a at naging malinis sa kanyang pakikitungo sa mga Sahabah رضي الله عنهم at inabutan ng kamatayan sa naturang sitwasyon ay mapapabilang kasama ng mga propeta at sugo, mga matutuwid na mga naniwala nang buong katapatan, mga martyr (namatay sa pakikibaka sa landas ng Allah تعالى), at mga mabubuting mananampalataya — kahit pa na mayroon siyang pagkukulang —."

At sinabi ni Bishr bin Harith رحمه الله :

"Ang Islam ay siyang pananampalataya, at ang pananampalataya ay siyang Islam."

At sinabi ni Fudayl bin Iyadh رحمه الله :

"Kapag nakakakita ako ng isang nagtataglay ng Sunnah ay para na ring nakikita ko ang mga Sahabah رضي الله عنهم, at kapag naman nakakakita ako ng isang nagtataglay ng Bid'a ay para na ring nakikita ko ang mga Munafiq /huwad at mapagkunwaring muslim."

At sinabi ni Yunus bin 'Ubayd رحمه الله :

"Ang nakapagtataka sa kasalukuyan ay yaong nananawagan sa tamang pananampalataya, at ang labis na nakapagtataka ay yaong sumasagot at nagpapaunlak sa panawagang ito."

At ang huling payo ni Bin 'Awn رحمه الله bago siya pumanaw :

"Panghawakan ninyo ang Sunnah/pamamaraan ng Ahlus Sunnah wal Jama'a at pakaiwasan ang mga Bid'a."

At sinabi ni Imam Ahmad bin Hambal رحمه الله :

"Nung namatay ang isa sa aking mga kasamahan, siya ay nagpakita sa  aking panaginip at nagwika:" Sabihin ninyo kay Ahmad na pangalagaan ang Sunnah, sapagkat ito ang kauna-unahang itinanong sa akin ng Allah تعالى. "

At sinabi ni Abul-aliya رحمه الله :

"Sinuman ang bawian ng buhay sa kanyang pinanghahawakang Sunnah nang malinis at hindi man lamang nagtaglay ng Bid'a ay maituturing na isang Siddiq /matuwid na naniwala nang buong katapatan."

At sinasabi  niya rin:

"Ang pangangalaga at pananatili sa pamamaraan ng Ahlus Sunnah wal Jama'a ay siyang kaligtasan. "

At sinabi ni Sufyan Aththawry رحمه الله :

"Ang sinumang nakinig nang maigi gamit ang kanyang tainga sa isang ligaw na nagtataglay ng Bid'a ay tunay na lumabas sa pangangalaga ng Allah تعالى at ipinaubaya na nang lubos sa taong ligaw na yaon."

At sinabi ni Dawud bin Abi Hind رحمه الله :

"Ipinahayag ng Allah تعالى kay Propeta Musa bin Imran عليه السلام na huwag umupo kasamá ng mga nagtataglay ng Bid'a, at kung sakaling uupo ka sa kanila  at nang dahil dun ay maapektuhan ka at magsimulang mag-aalinlangan, Impyerno ang ipaparusa ko sa'yo."

At sinabi ni Fudayl bin Iyadh رحمه الله :

"Ang sinuman makiupo sa mga nagtataglay ng Bid'a ay hindi ma pagkakalooban ng tamang kaalaman."

At sinabi niya rin:

"Sinuman ang tumatangkilik sa isang taong nagtataglay ng Bid'a ay ipasasawalambahala ng Allah تعالى ang kanyang mga gawain at babawiin ang liwanag ng Islam mula sa kanyang puso. "

At sabi niya rin:

"Ang sinumang umuupo kasama ng mga nagtataglay ng Bid'a, iwasan siya kahit sa daan kung makasalubong man ay mangyaring tumahak ng ibang daan."

At sabi niya rin:

"Ang sinumang rumerespeto sa isang nagtataglay ng Bid'a ay parang tinulungan niya ang isang ligaw na sirain ang relihyong Islam. At sinumang ngumiti sa isang nagtataglay ng Bid'a ay para na ring minamaliit niya ang ibinaba ng Allah تعالى sa kanyang Propeta صلى الله عليه وسلم. At sinumang ipinakasal ang kanyang anak sa isang nagtataglay ng Bid'a ay parang pinutol na niya ang relasyon sa pagitan niya at sa pagitan ng kanyang anak. At sinumang nag-asikaso sa labí ng isang nagtataglay ng Bid'a ay mananatili siya sa pagkagalit ng Allah تعالى hanggang sa kanyang pagbalik sa kanyang tirahan. "

At sabi niya rin:

"Magagawa kong kumain kasama ng isang Hudyo, magagawa kong kumain kasama ng isang Kristiyano, ngunit hindi ko magagawang kumain kasama ang isang nagtataglay ng Bid'a. At mas nanaisin kong magkaroon ng bakod na yari sa bakal sa pagitan naming dalawa."

At sinabi niya rin:

"Kapag nalaman ng Allah تعالى na ang isang muslim ay may pagkamuhi sa isang nagtataglay ng Bid'a ay patatawarin sa kanya ng Allah تعالى kahit na siya ay nagtataglay lamang ng kakaunting kaalaman. At ang pakikisama sa kanya ng isang Sunni ay isang uri ng pagkukunwari. At sinumang umiwas sa kanya at sa katulad niya ay matutumbasan ng liwanag ng pananampalataya, at sinumang nagtaboy sa kanya ay matutumbasan ng kaligtasan sa Araw ng paghuhukom. At sinumang magbababa sa kanila ay itataas siya ng Allah تعالى sa Paraiso ng sandaang pangkat. Kung kaya't huwag sanang matulad sa kanilang mga nagtataglay ng mga Bid'a magpahabang buhay."

---W—————A—————K—————A—————S---

‪#‎transbrbhry296‬

ترجمه أبو حيان

p46

162. Ang pananampalataya na ang sampó sa  mga Sahabah رضي الله عنهم , sa kanila naganap ang pagsaksi ng Propeta صلى الله عليه وسلم na sila ay makakapasok ng Paraiso at kabilang sa maninirahan dito — nang walang pag-aalinlangan —.
163. Ang Salawat* ay natatangi kay Propeta صلى الله عليه وسلم at sa kanyang mga pamilya at kasamahan.
164. At iyong pakaalamin na si Uthman رضي الله عنه ay pinatay nang hindi makatarungan, at ang mga pumatay sa kanya ay mapagmalabis at mandaraya (kriminal).
165. Sinuman ang sumasang-ayon sa anumang napapaloob sa aklat na ito at nananampalataya sa mga ito at ginawa niyang pamantayan nang walang pag-aalinlangan sa alinman sa mga ito, tunay na siya ay kasapi ng Ahlus Sunnah wal Jama'a, kahit siya ay nag-iisa lamang. At sinuman ang tumanggi sa mga bagay na napaloob sa aklat na ito ay maituturing na ligaw.
166. At sinuman na kanyang pasinungalingan kahit na isang salita mula sa Qur-an o sa bagay na ipinarating ng Propeta صلى الله عليه وسلم ay kanyang makakamit anuman ang nababagay sa kanya. Kung kaya't katakutan mo ang Allah تعالى at maging maingat at mapanuri sa iyong pananampalataya.
167. At kabilang sa pananampalataya ng Ahlus Sunnah wal Jama'a, huwag mong tulungan ang sinuman sa kanyang pagkakasala at pagsuway sa Allah تعالى, huwag sumang-ayon at sumunod sa utos ninumang nakatataas na sumasalungat sa kautusan ng Islam, at nararapat itong kamuhian alang-alang sa Allah تعالى.
168. At ang paniniwala na ang Tawbah/pagbabalik-loob sa Allah تعالى ay obligado at nararapat sa lahat, ito man ay maging maliit na pagkakasala o malaki.
169. At sinuman ang hindi sumang-ayon sa pagsaksi ng Propeta صلى الله عليه وسلم na sila ay kabilang sa mga maninirahan sa Paraiso ay siyang ligaw at may pag-aalinlangan kay Propeta صلى الله عليه وسلم sa kanyang ipinaabot.

==================
Talababaan:
* ang panalangin na ( اللهم صل على محمد وعلى آل محمد) o
(صلى الله عليه وسلم).

#transbrbhry296

ترجمه أبو حيان

p45

158. At hindi maaari sa sinumang muslim na sabihin: “Si Pulano ay kasapi ng Ahlus Sunnah wal Jama’a.” hangga’t sa kanyang mapag-alaman nang lubusan na ang taong kanyang tinutukoy ay tunay ngang nagtataglay ng pamamaraan ng Propeta صلى الله عليه وسلم at ng kanyang mga Sahabah رضي الله عنهم .
159. At sinabi ni Abdullah bin Mubarak رحمه الله :

“Ang pinagmulan at ugat ng pitumpo’t dalawang sekta ng Islam ay ang napso-hawa, at itong napso-hawa ay nahahati sa apat, at mula sa apat na bagay na ito umusbong ang pitumpo’t dalawang sekta ng Islam. Ito ay ang mga sumusunod:
l- Qadariyya
ll- Murji’ah
lll- Shi’a
lV- Kha-riji."

Ang sinuman na kanyang pinaniniwalaan na sina Abu Bakr, Umar, Uthman, at Ali — sa kanilang pagkakasunud-sunod — ay nangunguna sa lahat ng mga Sahabah رضي الله عنهم at wala man ding sinasabing hindi angkop sa mga natitirang Sahabah رضي الله عنهم at nananalangin para sa kanila ng kabutihan, ay hindi sinasaklaw ng sekta ng Shi’a.
Ang sinuman na naniniwala na ang pananampalataya ay isinasalita at isinasagawa, tumataas at bumababa, lumalakas at humihina, ay hindi na sinasaklaw ng sekta ng Murji’ah.
Ang sinuman na kanyang pinaniniwalaan na ang Salah ay nasa pangunguna ninuman — mapa-mabuti man siya o masama —, at ang Jihad ay nasa pangunguna ng pangkalahatang pinuno, at hindi maaaring lumabas sa pamumuno ng pangkalahatang pinuno sa pamamagitan ng pagpaslang sa kanya o pagsuway, at nananalangin para sa ikabubuti ng kanyang pinuno, ay hindi sinasaklaw ng sekta ng Kha-riji.
At sinuman na kanyang pinaniniwalaan na ang lahat ng mga pangyayari ay itinakda ng Allah تعالى, ito man ay mabuti o masama, inilíligaw Niya ang sinumang Kanyáng nanaisin at ginagabayan Niya ang sinumang Kanyáng naisin, ay hindi sinasaklaw ng sekta ng Qadariyya. Bagkus siya ay kabilang sa Ahlus Sunnah wal Jama'a.
160. Isang Bid'a ang lumitaw na siyang nagpapasinungaling sa Allah تعالى at kawalan ng pananampalatayang Islam, ang sinumang tumangkilik at paniwalaan ito ay tunay na nawalan ng pananampalataya, ito ay ang paniniwala sa muling pagbabalik ng isang nilikha sa mundo bago dumating ang Araw ng paghuhukom at sinasabi na si Ali bin Abi Talib ay buhay hanggang ngayon at muling magbabalik sa takdang oras bago ang paggunaw ng mundo, at gayundin sina Muhammad bin Ali, Ja'far bin Muhammad, at Musa bin Ja'far. Iyan ang kanilang pinaniniwalaan at sila ay may-natatanging kaalaman ukol sa mga lingid na bagay na tangi lamang ang Allah تعالى ang nakakaalam. Kaya't sila ay pakaiwasan dahil pinasinungalingan nila ang Allah تعالى at nawalan sila ng pananampalataya at gayundin ang mga tumatahak ng kanilang paniniwala.
161. Sinabi ni Ta'ma bin Amr at ni Sufyan bin Uyayna رحمهما الله :

"Sinuman ang may pag-aalinlangan sa kainaman nina Uthman at Ali sa pamumuno, — kung si Ali ba ang nararapat na umupo bilang pinuno kaysa kay Uthman — ay isang Shi'a at hindi papahintulutan sa kanya ang pagsaksi, hindi kakausapin at hindi sasamahan sa kanyang pag-upo. At sinuman na kanyang mas inuuna si Ali kay Uthman ay isang Ra-fida na kanyang tinanggihan ang katuruan ng Propeta صلى الله عليه وسلم. At sinuman na kanyang inuuna ang apat sa lahat ng mga Sahabah رضي الله عنهم at nananalangin sa kanila ng "Kaawaan nawa sila ng Allah تعالى. ", nagpigil sa paninira sa kanila ay nasa tamang pamamaraan, gabay at katotohanan."

‪#‎transbrbhry296‬

ترجمه أبو حيان

p44

157. At kapag narinig mo ang isang lalaki na nagwika: “Tunay na dinadakila namin ang Allah تعالى.”  sa tuwing kanyang naririnig ang mga Hadith ng Propeta صلى الله عليه وسلم na nauukol sa Kanyang mga katangian, pakaalamin na ang lalaking yaon ay isang Jahmian. Sapagkat nais niyang pasinungalingan ang mga  Hadith ng Propeta صلى الله عليه وسلم at kaya niya lamang ito nasambit. At sa pag-aakalang dinadakila niya ang Allah تعالى sa pamamagitan ng mga katagang ito sa tuwing naririnig ang mga Hadith na patunay na makikita ng mga mananampalataya ang Allah تعالى sa Araw ng paghuhukom at patunay sa pagbaba ng Allah تعالى sa kalangitan sa tuwing pagsapit ng ikatlong bahagi ng gabi, at iba pang mga Hadith na may kauukulan sa mga katangian ng Allah تعالى. Hindi baga’t parang pinasinungalingan niya na rin ang Propeta صلى الله عليه وسلم nung kanyang sinabi: "Dinadakila namin ang Allah تعالى sapagkat hindi umaangkop na sabihin na ang Allah تعالى ay bumababa mula sa isang lugar tungo sa ibang lugar.” ? At para na ring kanyang sinabi na siya ay mas higit na maalam sa Allah تعالى kaysa Kanyang Propeta صلى الله عليه وسلم. Pakaiwasan ang mga tulad nila dahil karamihan sa mga tao ay basta na lamang tumatanggap ng anumang maka-Islamikong ideya nang walang pagsusuri. Kaya’t bigyang babala ang mga tao tungkol sa kanila.
    At kapag may nagtanong sa’yo tungkol sa bagay na napapaloob sa aklat na ito bilang isang nangangailangan ng kaliwanagan at gabay ay nararapat mo siyang gabayan at turuan. Ngunit kapag naman siya ay nagtanong upang makipagtalo at makipagbangayan, marapat mo siyang iwasan at hayaan. Sapagkat ang mga bagay na tulad ng pakikipagbangayan at pakikipagtalo ay mahigpit kang pinagbabawalan sa mga ito dahil hindi ito ang tamang pamamaraan upang makamtan ang katotohanan.
    Sinabi ni Hasan Albasry رحمه الله :

“Ang isang matalino ay hindi nakikipagtalo  at nakikisama matanggap lamang ang kanyang kaalaman, bagama’t kung ito man ay tatanggapin ay pinapasalamatan at pinupuri niya ang Allah تعالى at kapag hindi man ito tinanggap ay pinapasalamatan at pinupuri niya ang Allah تعالى."

    Minsan ay may dumating kay Hasan at nagwika: “Halika’t paghambingin natin ang ating nalalaman sa pananampalataya.” Ang tanging sagot ni Hasan: 

“Tiyak kong nalalaman nang husto ang aking relihiyon at pananampalataya, kung hindi mo pa man din natagpuan ang iyong relihyon ay lubayan mo ako at hanapin mo ang katotohanan.”

    At minsan ay narinig ng Propeta صلى الله عليه وسلم ang isang lipon mula sa mga Sahabah sa tapat ng kanyang silid, wika ng isa sa kanila: “Hindi ba sinabi ng Allah تعالى ay ganito?”, ang sabi naman ng isa: “Hindi ba sinabi ng Allah تعالى ay ganito?”. Nang marinig ito ng Propeta  صلى الله عليه وسلم ay agad na tinungo sila na tila bahid sa kanyang pagmumukha ang matinding galit at nagwika:

 “Iyan ba ang ang inutos ko sa inyo?, Iyan ba ang dahilan kung bakit ako isinugo sa inyo?, Iyan ba, ang paghambingin at pagtalunan ninyo ang salita ng Allah تعالى !”

 Kaya’t sila ay pinagbawalang makipagtalo at makipagbangayan.
    At sina Abdullah bin Umar at Anas bin Malik رضي الله عنهم at ang mga iba pang pantas magpasakasalukuyan ay kanilang tinatanggihan ang paghahambing at pakikipagtalo.
    Bagkus ang salita ng Allah تعالى ang siyang nakahihigit sa lahat ng mga salita, Kanyang sinabi:

(مَا يُجَادِلُ فِي آيَاتِ اللَّهِ إِلَّا الَّذِينَ كَفَرُوا فَلَا يَغْرُرْكَ تَقَلُّبُهُمْ فِي الْبِلَادِ)

[سورة غافر 4]

Sa malapit nitong pakahulugan:

          Walang nakikipagtalo hinggil sa mga talata ng Qur-an at  mga katibayan nito na tinatapatan at hinahambing ito sa kamalian  maliban sa  mga di-mananampalataya at nawalan ng pananampalataya, kung kaya'y huwag kang magpapalinlang sa kanilang  kagalingan  sa  paglalakbay  na pagpaparoo’t paparito  dahil sa pangangalakal, at sa sarap at  kinang ng  makamundong buhay na taglay nila.

             At minsan ay tinanong si Umar bin Khattab رضي الله عنه ng isang lalaki: "Ano ang kahulugan ng ( والناشطات نشاطا) na nabanggit sa Surah Annazi-'at?” Ang sagot ni Umar: “Kung ikaw lamang ay kalbo* ay pinugutan na kita ng ulo.”
    Naiulat na sinabi ng Propeta صلى الله عليه وسلم:

“Ang isang ganap mananampalataya ay hindi nakikipagtalo — at ako ay hindi mamimintakasi** sa sinumang nakikipagtalo sa Araw ng paghuhukom —  kaya’t iwan ang pakikipagtalo dahil walang itong maidudulot na mabuti.” ***

===============
Talababaan:
* ang pagiging kalbo ay isang palatandaan ng mga Kha-riji dahil ito ay itinuturing nilang pagsamba.
** mamamagitan para matulungan
*** ito ay naiulat bilang Hadith , ngunit pagkaraang masuri ng mga pantas sa larangan ng Hadith, ang nasabing Hadith ay napag-alaman na ito pala ay isang kathang Hadith lamang.

#transbrbhry296

ترجمه أبو حيان

p43

153. At kung nanaisin na maging matuwid at manatili sa katotohanan at sa pamamaraan ng   Ahlus Sunnah wal Jama'a, pakaiwasan ang kaalamang pilosopiya at mga pilosopo, pakikipagtalakayan at pakikipagtalo, paghahalintulad sa mga katangian ng Allah تعالى , at paghahambing sa pagitan ng mga sekta ng Islam. Sapagkat ang simpleng pakikinig lamang sa kanila — kahit na hindi mo ito nais na pakinabangan — ay maaaring maging sanhi ng pagdududa sa ibang aspekto ng pananampalataya at mapipilitan mong tanggapin ang bagay na nagmula sa kanila na siyang naging sanhi ng iyong pagdududa. At sa huli ay matutulad sa kanila  na pawang  ligaw sa katotohanan. At lahat ng kahuwaran at pagkukunwari, makabagong panrelihyon(Bid'a), napso-hawa at pagkaligaw ay sanhi ng pilosopiya, pakikipagtalakayan at pakikipagtalo, paghahalintulad sa mga katangian ng Allah تعالى. At ang mga ito ang pinagmumulan ng Bid’a , pagdududa at pagkukunwari’t kawalan ng pananampalataya.
154. Kung kaya’t katakutan ang Allah تعالى  sa kapakanan ng iyong sarili at panghawakan ang pamamaraan ng Propeta صلى الله عليه وسلم at ng kanyang  mga Sahabah , at ang pagtahak sa kanilang pamamaraan dahil iyan ang tanging daan tungo sa tamang pananampalataya.  Sapagkat hindi nila tayo iniwan sa pagkaligaw o kalituhan, sapagkat nabigyang-linaw na ang lahat ng bagay at naiparating na ang lahat ng mga katibayan. Kung kaya ay wala nang puwang para sa pagdududa at pagkalito. Kaya’t sila’y sundin at tularan, at huwag nang maging abala sa paghahanap ng kaliwanagan dahil ito’y nabigyang-linaw na nila.
155. At sa mga Mushtibahat/kahina-hinalang bagay na maka-relihyon — ito man ay mapa-Qur-an o mapa-Sunnah — ay maghunos-dili kang marapat at huwag nang tangkaing magsunog pa ng kilay maabot lamang kung ano ang dapat.
156. At huwag mong tapatan at patulan ang mga taong ligaw na nagtataglay ng mga Bid’a , at sagutin ang kanilang mga katanungang mapanlilo nang wala kang sapat na kaalaman at kahandaan. Sapagkat marapat sa iyo ang tumahimik na lamang. At huwag mong hahayaan na ikaw ay pananaigan nila. Hindi mo ba napag-alaman na si Muhammad bin Sirin رحمه الله — sa kabila ng kanyang kalamangan sa  pananampalataya at kaalaman — hindi niya pinatulan ang isang ligaw na lalaki sa kanyang nag-iisang katanungan at ni hindi niya pinakinggan mula sa kanya ang kanyang binanggit na mula sa banal na Qur-an? At nung siya ay tinanong kung bakit ganun na lamang ang kanyang inasal, kanyang sinagot:

“Ako ay lubhang nangamba na kung sakaling mabigyan ng pagkakataon ang taong yaon ay kanyang mabibihag ang aking isipan.”

#transbrbhry296

ترجمه أبو حيان

p42

150. Maging maingat nang husto lalo na sa kasalukuyang henerasyon. Suriing mabuti ang iyong kinakatabi, kasa-kasama at iyong pinakikinggan. Sapagkat halos lahat ng mga tao sa kasalukuyan ay napakalapit sa pagkaligáw maliban sa silang ginabayan ng Allah تعالى.
151. At pakasuriin, kung iyong maririnig ang isang muslim na kanyang parating bukambibig ang mga pangalan nina: Bin Abi Du-ad, Bishr Almirrisi, Thumamah, Abu Hudhayl, Hisham Alfu-ti, o alinman sa kanilang masugid na tagasunod, ay pakaiwasan siya dahil siya ay isang ligaw. Sapagkat ang mga pangalang nabanggit ay pawang hindi mga muslim at mga ligaw. At hayaan mo ang naturang lalaki  na pumupuri  sa kanila.
152. At ang pagsusuri at pagsubok sa isang muslim sa  kanyang  pananampalataya ay Bid'a at hindi ito nangyari sa mga naunang salihlahi. Ngunit sa kasalukuyang panahon, kinailangan nang suriin ang isang muslim sa pamamagitan ng Sunnah o pamamaraan ng Ahlus Sunnah wal Jama'a, sinabi ni Bin Sirin رحمه الله :

"Pakasuriin ninyo ang taong pinagkukunan ninyo ng kaalamang panrelihyon, at mangyaring huwag kumuha ng Hadith maliban sa kanilang  may kagandahang-ásal-Islamiko."

    Kaya't pakasuriin  muna nang mabuti, at kung mapag-alaman na siya ay kabilang sa Ahlus Sunnah wal Jama’a, may sapat na kaalaman at may kagandahang asal, nararapat na sa kanila ay magtanong, makiupo at makinabang sa kanilang kaalaman. Ngunit kapag mapag-alaman na siya ay hindi kasapi ng Ahlus Sunnah wal Jama'a, nararapat lamang na iwanan at iwasan siya.

#transbrbhry296

ترجمه أبو حيان

p41

147. At iyong pakaalamin na sinuman ang may masamang balakid — kahit isa man lang  — sa mga Sahabah ng Propeta صلى الله عليه وسلم, ang kanyang pangunahing pakay sa gawaing ito ay upang siraan ang Propeta صلى الله عليه وسلم at tunay na kanyang niyamót ang Propeta صلى الله عليه وسلم kahit na siya ay yumao’t bangkay na.
148. At kapag iyong natuklasan sa isang tao ang isang makabagong panrelihyon (Bid'a),marapat mo siyang iwasan, at dapat mong malaman na ang mga bagay na tulad ng napag-alaman mo na lingid sa iyong kaalaman ay mas marami kaysa sa  iyong napagmasdan.
149. At kapag nakita mo ang isang muslim mula sa Ahlus Sunnah wal Jama'a kahit pa nagtataglay ng kasalanan, kung siya naman ay nasa tamang pamamaraan ng Propeta صلى الله عليه وسلم, ay iyo siyang samahan at umupo kasamá niya. Sapagkat hindi ka mapipinsala ng kanyang pagkakasala. Datapwa't kung makatagpo ka ng isang taong napakatiyaga sa pagsamba at halos iwan na ang mundo nang lubos, at halos walang pahinga ngunit siya naman ay nagtataglay ng napso-hawa at Bid'a, huwag pasisilaw sa kanyang mapanlinlang na gawain at ni makiupo sa kanya, ni kausapin siya at ni makisabay sa kanya sa paglalakad ay huwag nang pagtangkaan. Dahil hindi ko magagarantiya sa iyo na hindi ka madadala at matutulad sa kanya at ikaw ay maliligaw kasama niya.
        At minsan nakita ni Yunus bin Ubayd ang kanyang anak na lumabas mula sa bahay ng isang ligaw. Nung siya ay dumating, kanyang tinanong ang kanyang anak: "Saan ka galing, mahal kong anak?" Ang sagot ng anak: "Doon po kay Pulano*." At kanyang sinabi: "O aking anak, mas pipiliin kong makita kang lumabas sa bahay ng makasalanang muslim kaysa makita kang lalábas sa bahay ni Pulano na isang ligaw at huwad na muslim. At ang bawian ka ng buhay na ika'y makasalanan ay mas mainam kaysa abutan ka ng kamatayan na ika'y ligaw sa tamang pamamaraan.".
        Hindi mo ba naisip kung bakit mas pipiliin ni Yunus ang ganun sa kanyang mahal na anak? Ito ay dahil sa alam ni Yunus na ang isang makasalanan ay hindi niya ililigaw ang kanyang anak, di-hamak sa tulad ng isang mala-di-makabasag pinggan na ang kapahamakang taglay ay mas masaklap pa sa bubog ng isang pinggan. Sapagkat kanya siyang ililigaw hanggang tuluyan na niyang talikuran ang Islam na kinagisnan.

==============
Talababaan:
* ito ay tumutumbas sa wikang banyaga na JOHN DOE

#transbrbhry296

ترجمه أبو حيان

p40

142. Sinabi ni Abdullah bin Mubarak رحمه الله :

"Huwag ninyong kunin ang mga bagay na nauukol sa Ra-fida mula sa mga taga-Kufa, at huwag ninyong kunin ang paghihimagsik laban sa namumuno mula sa mga taga-Sham,at huwag ninyong kunin  ang anumang kaalaman ukol sa tadhana mula sa mga taga-Basra,at huwag kumuha ng kaalaman sa mga Murji'ah na taga-Khurasan, at huwag ninyong kunin ang pamamaraan na mga taga-Makkah sa kanilang pagpapalitan ng pera sa pera, at mga awit mula sa taga-Madinah."

143. At kapag nakita mo ang isang tao na minamahal sina Abu Hurayra, Anas bin Malik, at si Usayd bin Hudayr, pakaalamin na siya ay kasapi ng Ahlus Sunnah wal Jama'a. At gayundin ang sinumang nagmamahal kina Ayyub, bin 'Awn, Yunus bin 'Ubayd, Abdullah bin Idris Al-awdi, Sha'bi, Malik bin Migwal, Yazid bin Zuray', Muad bin Muad, Wahb bin Jarir, Hammad bin Salama, Hammad bin Zayd,Malik bin Anas, Al-awza'i, Za-idatu bin Qudama, at kina Ahmad bin Hambal, Hajjaj bin Minhal, at Ahmad bin Nasr.
144.At kapag nakita mo ang isang muslim na umuupo sa isang ligaw na guro, nararapat sa iyong payuhan ang iyong kapatid na muslim, ngunit kapag patuloy siyang umuupo sa taong yaon sa kabila ng mga payo sa kanya, marapat mo na siyang iwasan, marahil nalason na rin ang kanyang kaisipan.
145.At kapag narinig ang isang tao na pinapayuhan gamit ang mga Hadith at kanya itong tinatanggihan dahil ang gusto niya  ay payo na mula sa Qur-an, walang duda na siya ay nagtataglay ng huwad na pananampalataya kung kaya't lisanin siya ay huwag nang umupo sa kanya.
146. At iyong pakaalamin na ang lahat ng napso-hawa* ay masama ang dulot nito na magsasanhi sa paghihiwa-hiwalay, pagsuway sa pinuno/Imam at maaaring maging sanhi ng himagsikan at kaguluhan. At ang pinakamatindi at masamang pangkat at pinakamalayo sa katotohanan na dulot ng napso-hawa ay ang mga Ra-fida, Mu'tazila at Jahmian. Sapagkat sila ang naghuhumok sa mga tao na pabulaanan ang mga katangian ng Allah تعالى at upang maging huwad na mga mananampalataya at marupok sa kanilang kinatatayuan.

================
Talababaan:
* lahat ng bagay na salungat sa katuruan ng Qur-an at ng Sunnah, ito man ay símulain, pananaw, ideya, kagustuhan o gawa ay matatawag na napso-hawa.

#transbrbhry296

ترجمه أبو حيان

p39

141. At kapag narinig mo ang isang tao na nagsasabi ng: "Si Pulano ay isang Na-sibi*.", marapat mong malaman na ang taong iyan ay isang Ra-fida*. At kapag narinig naman ang isang taong nagsasabi ng: "Si Pulano ay kanyang ihinahalintulad ang Allah تعالى sa kanyang mga nilikha.", mararapat mong malaman na ang taong yaon ay isang Jahmian* o Mu'tazila* o Ash'ari* o Maturidi*. At kapag narinig naman ang isang taong nagsasabi: "Ituro mo sa akin ang Tawhid**. ",marapat mong malaman na siya ay isang Kha-riji at Mu'tazila. At kapag narinig naman ang isang tao na nagsasabi: "Si Pulano ay isang Jabriyya*." o nagsasabi na "Ang alipin ay walang kalayaan sa kagustuhan at pagdedesisyon.", ang taong iyan ay isang Qadari*. Sapagkat ang mga bagay na ito  ay inimbento  lamang ng mga ligaw na grupo.

==============
Talababaan:
* ang mga nabanggit ay purong ligaw na mga grupo, sila ay ang mga sumusunod:
1- Na-sibi: isa sa mga katawagan ng pangkat ng Kha-riji - sila yaong mga may galit sa kapamilya ng Propeta صلى الله عليه وسلم lalo na kay Ali bin Abi Talib رضي الله عنه.
2- Ra-fida: isa sa katawagan ng pangkat ng Shi'a - sila yaong naniniwala na si Ali ni Abi Talib ang higit na mainam at mas nakalalamang sa mga Sahabah at lalong higit sa mga natitirang kalipa رضي الله عنهم. At naniniwala na ang kapamilya ng Propeta صلى الله عليه وسلم ang higit na karapat-dapat na mamuno sa mga muslim at ang pamumuno ng iba maliban sa kanila ay hindi makatarungan.
3- Jahmian: sila yaong mga sumusunod sa yapak ni Jahm bin Safwan -siya ang kauna-unahang nagsabi na ang Qur-an ay isang nilikha at pinasinungalingan ang mga katangian ng Allah تعالى.
4- Mu'tazila: isa sa mga ligaw na pangkat na binubuo ng iba't ibang mga simulain at pananaw sa pananampalataya mula sa iba't ibang ligaw na pangkat. At sila ay kilala sa kanilang tinataglay na pangunahing limang mga haligi ng pananampalataya:
          l- ang Tawhid batay sa pananaw ng mga Jahmian
         ll- ang katarungan, batay sa pananaw ng mga Qadari
        lll- ang pangako ng Allah تعالى at Kanyang panakot/babala
       lV- ang katayuan sa pagitan ng pananampalataya at di-pananampalataya
        V- ang pag-uutos ng kabutihan at pagbabawal ng kasamaan batay sa pananaw ng mga Kha-riji.
5- Ash'ari: isa sa mga ligaw na pangkat na siyang tumatalamak sa kapulaan ng Filipinas kasabay ng pangkat ng Shi'a. Sila yaong mga sumusunod sa yapak ni Abulhasan Al-ash'ari رحمه الله bago pa man siya magbalik-loob mula sa kanyang maling pananaw. Si Abulhasan رحمه الله ay unang naging Mu'tazila ngunit sa kahuli-hulihan ng yugto ng kanyang buhay, siya ay bumalik sa pamamaraan ng Ahlus Sunnah wal Jama'a.
6- Maturidi: sila yaong mga sumusunod sa yapak ni Abi Mansur Almaturidi. At ito ay kabilang din sa mga ligaw na pangkat dahil sa iilang mga pananaw nila sa mga katangian ng Allah تعالى ,ngunit ito ang mas malapit sa pananampalataya ng Ahlus Sunnah wal Jama'a.
7- Qadari: isa sa mga sangay ng pangkat ng Murji'ah — sila yaong mga kilala sa kanilang pananaw na : "Hindi mapipinsala at mababawasan ang pananampalataya kanyang anong laki ng kasalanan, at hindi mapapakinabangan ng isang di-mananampalataya anumang uri ng pagsamba."
8- Jabriyya: isa rin sa mga sangay ng pangkat ng Murji'ah na sumusunod sa yapak ni Jahm bin Safwan.
** ito ang Tawhid sa kanilang pananaw kung saan kanilang pinasisinungalingan ang mga katangian ng Allah تعالى.

#transbrbhry296

ترجمه أبو حيان